تحياتى

شعرت بوحشه غريبة لكل اصدقائي و خصوصا من هم يعيشون في غربة او بلد غير قاهرة المعز ،

شعرت باننى افتقد كل فرد منهم و رغم حديثي معهم عن طريق الماسنجر ( ربنا يخليه لنا ) لكن برضه شعرت بتلك الوحشة تغمر قلبي

فاود ان اهنئ صديقي و اخي ايمن قاسم افندي على قصصه القصيرة و احييه على فكرة وضعهم فى مكان خاص بهم ،يجمعهم جميعا ..

و ارسل تحية عطره لكل من سيقرأ كلماتي هذه و او يقوم بزيارة البلوج ،

على وعد مني ان شاء الله بالبدء مرة ثانية و حكاوي و مواقف جديدة

و اخيرا و ليس باخر كلكم بجد وحشتوني

انجى الكليسلى

25-9-2007

التاج الثاني

اهداني الاخ العزيز احمد عزام هذا التاج و بناءا عليه قبلت هذا التاج الجميل ...

اشكرك اخي الغالي احمد على إهدائي التاج .. بس يا رب يطلع مظبوط ربنا يستر بقى دا تاني تاج، مرر إلي الاول من

الغالي و القريب لي الاخ ايمن باشا قاسم و كان تاج الفضايح بس كان بجد تاج تحفه و للاسف يا احمد و الله ما كنت اعرفك لامرره ليك على وعد اني التاج التالت لو في حاتكون من اوائل الناس ان شاء الله

أحب شخص الى قلبك في الدنيا؟

اولادي.. . هم احب الناس إلى قلبي بعد الله

إنسان مستعد تضحي بحياتك _ركز في كلمة حياتك_عشانه؟

كل الناس الي بحبها .. و الي قريبين مني عرفين كده اني ممكن اهدي روحي و حياتي لاي حد في حاجة ليها .

إنسان كرهته لدرجه الجنون و تمنيت لو تمسك سكينه و تنقض عليه و تغرزه في قلبه تقتله و تقف تبص على جثته و تشفي غليل قلبك؟

يا ساتر يا رب لالالالا الحمد لله عمري ما كرهت حد الحمد لله يمكن ازعل اه و اخد موقف بس اول ما شوف الشخص ده بيبتسم ابدا افتكر انا موش كنت زعلانه من الشخص ده بسبب حاجة .ز اسلم عادي جدا و انا بفكر إيه الي كان مزعلني و لو افتكرت اعاتب و اقول انا كنت زعلانه منك بسبب كذا و خلاص .

ما هو إسم أجمل كتاب كتبه بشرقرأته و محتفظ به حتى الآن؟

رائحه الورد و انوف لا تشم ..... للكاتب احسان عبد القوس

إسم كتاب_كتبه بشر برضه_إنت متعلق بيه و بتقراه كل فترة؟

لا الحقيقة مافيش كتاب وصلني للدرجه دي بس يمكن لو فكرت حافكر بردوا في قصة إحسان عبد القدوس السابقه

أهم جهاز منزلي متعلق به او بتستخدمه كثير شيء تحس بالراحه النفسية عندما تنظر إليه؟

الموبيل اكيد و الدش طبعا و التليفزيون و الدوش اكيد و باقي اجهزه الحمام طبعا .. لدولاهم من اي حاجة تانيه و لاإيه؟

شىء تحس بالراحة النفسية عندما تنظر إليه؟

السماء و هي صافيه وكمان بالليل و ه ماليانه نجوم كتير اوي



مكان تحس فيه بالحنين إلى شىء لا تدري ما هو و ذكريات جارفة إلى لا شىء؟

إيه السؤال ده الغريب ده ... موش عارف بس ممكن تكون دبي هي اكتر مكان او بلد بحن للذهاب إليها اوي و كتير كمان

مكان تحس بالراحة عندما تدخله؟

غرفه نومي ..و خصوصا سريري .. يااااااا و موبيلي معايا و اللاب توب و نور خفيف و حاجة بشربها نسكافيه او شاي او عصير اي حاجة ، او بدل اللاب توب كتاب اقرا و اقفل عليه الباب .. كلام كبير موت

أجمل مدينة زرتها داخل مصر؟

شرم الشيخ – الاسكندريه


شخصية كرتونية تحبها؟

ويني ذي بووه – بيجليت كمان

نوع هاتفك المحمول؟

i-mate jAMin

سرعة بروسيسور جهازك؟

لا معرفش بس الي اعرفه انه اكيد اقل من التليفون العادي كمان

ذاكرة _هارد_جهازك؟

العادي 50 و الكارد 256

المساحة التي تشغلها المساحة الاسلامية على جهازك؟

لا الحقيقة موش عارفه بس هو في الاذان و مواقيت الصلاة و كده

نفس الاجابة السالف ذكرها في قلبك_الاجابة لنفسك عشان الرياء يا اخوانا؟

لا الحمد لله مساحه قويه و جامده الحمد لله

أهم هدف انت واضعه لحياتك الآن؟

تربية اولادي احسن تربيه و اضمن ليهم مستقبلهم و اسعدهم و احسن شغلي علشان كرهت شغلي الحالي

مواصفات فتى الاحلام بالنسبة لي؟

فتى احلام إيه بقىما خلاص .. بس الحمد لله جوزي بردوا فيه شويه من المواصفات دي
بس عموما يكون : طيب و حنيين و كريم و دافي و اكون اول حاجه في حياته و اخر حاجة و ظريف و يكون بيموت فيه .

صف ما يأتي شعورك لما بتسمع كلمة مصر؟

حزن و زعل كده

شعورك لما بتسمع كلام عن اليهود؟

حذبنا الله و نعم الوكيل فيهم

شعورك لما بتشوف ضابط شرطة؟

باقلق بصراحه علشان مايفتريش عليه باي حاجة و يغلش عليه و خلاص
ربنا يبعدنا عنهم .. و يجعلهم من نسايبنا او اقاربنا ممكن

شعورك لما بتشوف الكناس العجوز في الطريق؟

باتالم اوي و اقول يا رب اديني المال الوفير اوي علشان اعمل للناس دي حاجة ببلاش كده و اريحهم من الي هم فيه و ابقى نفسي انزل اركبوا في عربيتي و اديلوا الي فيه النصيب و اروحوا وكمان مرتب شهريين علشان يعد في بيته الشهريين دول

فكارك تجاه شاب ماشي في الطريق يلبس جلابية بيضاء قصيرة و عمامة و له لحية و بجيبه السواك و في يده المصحف؟

باكون سعيده و اتمنى ان اكون بنفس قوة إيمانه و برضوا خايفه يكون مجرد منظر بس و مافيش إيمان صادق جواه .. ربنا يهدي الجميع يا رب

إحساس يراودك في اشارة مرور مغلقة بسبب مسئول كبير؟

اروح اخبط على زجاج سيارته و اقوله ليه كل ده حرام عليك كم الناس الي انت معذبهم بسبب ان حضرتك مرواح و لا رايح اي مشوار حتى .. و لو حصل ابقو ا اسئلوا عليه انا فين .


يا رب يكون التاج كان شكلوا حلو .. اصلي بصراحه بحب موضوع التاج ده اوي
اشكرك اخي العزيز احمد اشكرك جدا


امرر التاج ده :

لباكي
قاسم افندي
خالد مصطفى

طارق المملوك
خالد ربيع

لا أعلم

تخيلت لو ان اني تعاملت مع الناس بطبيعتي و تعاملت مع كل من احبهم و اعرفهماو من حولي انهم فرد من افراد عائلتي ، فتلك هي طريقتي مع كل من اعرفهم و اتحدث معهم سواء يعيش هنا او بالجوار
و لكن اتضح اني غلطانه في طريقتي و اسلوبي هذا،
فتعودت ان افتح قلبي للناس من نصح و ارشاد إن امكاني ذلك و امد يدي بل و ذراعي لاخر مدى لاريح من اعرفه و كلي لمن شاء اذان صاغيه اسمع واحاول ان احل او اخفف الام من يتالم غير مباليه بما انا فيه ،
و لن انكر اني اجد ما اجنيه ايضا و اجد من يقف و ياخذ بيدي في وقعاتي و احزاني و يظهر لي من يمسح دمعي في شدتي
لكني فؤجئة ان طبيعة تعاملي مع الناس يفهمها إيناس اخرين بانه تصرفات غير لائقه بل تميل إلا عدم الاحترام و البلاها و الهبل
احقا هذا ؟
امن يفتح قلبه للناس يكون اهبل ؟ امن يتمتع بروح المداعبه و التهريج يكون سفيه؟ امن يهتم بالناس و يمد يده لهم يكن ذو تصرفات غير لائقه ؟
فطبيعتي تغلب علي اعترف... فانا هكذا انسانه تحب الناس ، تخاف عليهم ، تود لو ترى الناس كلها سعداء معا متكاتفيين يحبوا بعضهم البعض ،
اعلم اني كما قيل لي احلم بالحياة الفاضلة التي هي صعبه المنال و لكني كثيرا ما ارى ان هناك اكيد امل بل هناك حقا امل في ان نعيش هذه الحياة لما لا ؟
لقد تحيرت نعم حتى انني توصلت اليوم و انا اكتب تلك السطور إلى اني اتقوقع مع نفسي افضل ، ابتعد عن كل اناس سواء من هم مؤمنون باسلوبي و فرحيين بيه او من ليس عندهم إيمان باسلوبي
لا ادرى ماذا افعل ابتعد عن الناس و اعيش مع نفسي و في خيالي و عائلتي فقط ي تلك المدينة الفاضلة التي في خيالي ام ماذا؟ اقتنع اني مخطيئة في اسلوبي مع الاخرين ؟ام استمر بطبيعتي و ربنا هو الاعلم بصفاء مشاعري و نيتي؟ لااعلم ....

ينطبق عليه قول

منذ فترة قمت ببيع عريتي... مع انها كانت من سنتين بس "فله" بس القدر لعب لعبتة و قمت بتعين سائق " سامحة الله بقى" فلقد قام بتدمرها تماما و لم يكتفي بذلك بل الحقيقة اصابني في مبلغ للمخالفات وهمي ... موش حاقوله علشان الناس ماتفكرنيش اني بفشر أو بكذب .المهم بعت عربيتي (كانت هيونداي بالمناسبة )
في اول الامر .. كنت استمتع جدا بالمشي و كلي نشاط .. اينعم مازلت و لكني في الصباح اضطر لركوب تاكسي ...و يا مأساة ركوب تلك النوع من الواصلات في بلدنا الحببية العظيمة.

فتجد نفسك امام عربات متنوعةالماركات و تختار بقى .. شاهين – بيجو سوزوكي ... إلخ هناك انواع بالطبع انقرضت تماما .. اتحدا من يركب التاكس ان يجد السياره من الاخل مثلما هي من الخارج .. فإما الزجاج بدون اوكره و مفتوح الزجاج و يا سلام بقى لو في الشتاء القارص او الزجاج مقفل و في عز الحر و سوف اترك لكم كل التخيل في هذه اللقطة و ما اكر التاكسي ذوي الابواب التي تفتح من الخارخ فقط و ليس لديه اكره تفتح من الداخل . صادف بقى هذا الصباح انني استقليت تاكسي و كانت بيجو و طبعا في هذا اللحظة بكون في قمة الاستعجال للذهاب للشغل في موعده و ماخرا اعترف اني بقيت دايما بتاخر .. المهم استقليت ذلك التاكسي ذو المركة المشهورة عالميا و معروفه بقوتها و سرعتها و لكن يظهر ان تلك البيجو كانت تيواني فكل 3 دقائق كانت تعطل السيارة و اكرر 3 دائق لاني حسبتها وليس فقط تعط السيارة كان كافيا بل كذلك الكانبه الصناعه اليدويه لاتذكر اثناء ذهابي للعمل تلك الارجوحة المشهورة " الميزان " عارفينها ... اكيد فاكرينها .
و بالطبع بعد كل الي قولته لكم وصلت شغلي بعد ثلث ساعة بدل من السبع او العشر دقائق اليومية .

يالا الماساة حقا.. فكيف لنا ان نهتم بأمور و نترك امور كهذه في بلادنا الحبيبة .. كيف ندقق على ربط حزام الامان ... حزام الامان الوهمي الذي ليس له اي امان في تلك السيارات التي هي وسيلة المواصلات لاغلبية الشعب
فحقا ينطبق علي التاكسي القول " من بره هلا هلا و من جوه يعلم الله "

الوحدة

كل انسان و كائن حي على وجه الارض له شعور و مشاعر ... تختلف بالطبع من انسان لاخر و لكنها واحده معروفه للجميع ، فجميعنا عندما نشتاق لاحد ينتابنا شعور"الوحشه" (بفتح الحاء)
و عند البعد عن الوطن او شخص ما ينتابنا الشعور " بالحنين "
و هناك الفرح و الحزن و التفائل و التشائم و ايضا ..... الوحده
و يا له من شعور
في الفرح يمكن ان تبكي من الفرح كما في الحزن و في الوحشة يمكن ان تجري اتصال او تكتب خطاب او في عصرنا إيميل في السريع
انما الوحده يا ويلتي من تلك الكلمه الذابحه
صعوبتها في الاحساس بها
فمااصعب الشعور بانك وحيد و انت في وسط الناس و الاصعب ان تكون هكذا و مع من يحبونك
بل الاصعب ان تشعر به ايضا في حضن من تحب صعب ان تشعر انك تتمناه .. تناديه و لا يناديك او حتى يناجيك و لا يشعر بيك .
فيا وحشه الشعور بالوحدة مع من تحب و يا وحشتها و انت وسط الاهل
ان تكون معهم و ينتابك الشعور بان لااحد يدرك وجودك و رغم الاحاديث و تبادل الاراء معك و لكنك تشعر بتلك الوحدة بداخلك و الاصعب ان تشعر بالوحده مع نفسك فلا تعرف إلي اين و مع من ؟
كيف ياتي للانسان هذا الشعور و لما ياتي ؟ لا احد يدرى سببه بالظبط .. لكنه ياتي و يا ليته ما ياتي .

انجى الكليسلى

فضايح

تلقيت منذ فترة دعوه و ما اغرب تلك الدعوة التي تليقتها ..و هي دعوة نشر فضائح و مواقف و بالطبع الكل يعلم من هو باديء تلك الفكره و لاحترامي و حبي و تقديري لكل من ايمن افندي قاسم و طارق المملوك فقررت ان اجمع ما استطيع و لكم التالي...... يا فضيحتي:

سابدأ من الجديد للقديم

دبي - فرنش باكري :

دبي بلد جميله بناسها و سكانها التي اعرفهم فيها طبعا ،و بسبب كرم المصريين اخواتي و اصدقائي فتشجعت و سافرت لدبي و الحقيقة دي مكنتش اول مرة اروح البلد دي ، بل كانت المرة الثانيه لكنها كانت من اجمل المرات طبعا لوجود اخواتي و اصدقائي ايمن افندي و طارق المملوك و لمياء اختي و صديقتي الغاليه و وليد عليوه و محمد الدبيكي وهاشم و ناس كتير محتاجه بلوج لهم لوحدهم اكتب فيه اسمائهم .الحقيقة كان مده اقامتي اسبوع ،طبعا زرت فيه اماكن كتير جميله من ضمن هذه الاماكن مكان اسمه فرنش بيكيري و هو عباره عن كافيه جميل، في هذا المكان مطرب صوته رائع و عازفه اروع ، ذهبنا انا و عليوه و ايمن و مملوك ، الجلسة كانت اخر سلطنة و جمال و قبل ما نروح استاذنتت و ذهبت الى الحمام و رغم انها لم تكن المرة الاولى و لكن بكل ثقه وقفت بصيت و دخلت و إذ بي اوفجئ بان باب احدي الحمامات بيفتح و فوجئت بقاسم افندي و لوهله وقفت في حاله تجمد و انا وهو في صوت واحد "إيه ده " و بكل ثقه قلتله :"إنت ازاي دخلت هنا دا الليدز روم يا ايمن " و بثقه اكتر مني رد قالي :" لا معلش ده المين روم يا انجي"
و بحركه سريعه فتح الباب يتاكد من اللافتة الخارجية ..و بكل احراج فوجئت انه فعلا كان الحمام الرجالي و انا اللي دخلت غلط
اللذيذ في الموضوع بقى ان كل العاملين في المكان كانوا متبعني و شايفني لما دخلت غلط و ولا اي حد قال اي حاجة بس لما خرجت الضحك طبعا كان للركب .


امريكا- المطافي:

اول مرة اركب فيها طياره و اسافر مع عائلتي لامريكا بالنسبة لي طبعا كانت قمة الانبهار خصوصا اني كان عندي 11 سنة ، كان في المبنى السكني اللي كنا نازلين فيه باب ازاز بينزل لبحيرة جميله كان فيها جميع انواع الطيور و كنت بانزل كل يوم من الباب الازاز الي بيؤدى للبحيرة كل يوم .. و في مرة لفت نظري زرار احمر كبير جنب الباب اللي بنزل منه كل يوم و كنت اول مرة اخد بالي منه و في بالي قلت اكيد الزرار ده بيفتح بطريقة تكنولوجيه الباب الي بينزل للبحيرة و بالتالي مديت إيدي و شديت الزرار لتحت و مهما وصفت صوت الصفاره الغير طبيعي اللى ملأ المكان ومش عارفه و فوجئت بناس بتجري و كم غير طبيعي من عربيات المطافي و البوليس و الاسعاف، كنت اول مره اشوف رجال المطافي على الحقيقة، اتضحلي ان الزرار ده هو زرار انزار لو في حريقة في المبنى و بالطبع هو موجود في كل المباني بس الجهل نور.. لن اخفى عليكم العلقه كانت سخنه .

العربيه اللادا

الموقف ده حصلي من يومين بالادق 15 مارس 2007 ، باختصار كنت اقود سياره زوجي و الحقيقة انه نادرا ما يسمح لي بسواقتها و الحظ الحقيقة المعتاد يحالفني و فوجئت بسيارة لادا موديل عم سحلول ولست في حاجة بان اوصف قوتها عند الاصتدام بالسيارات الحديثة ..المهم انها خبطتني و جريت و اختفت كمان
بكيت بكاء انهياري حتى انني في عودتي للبيت و افكر في كيف ابلغ زوجي بالمأساة التي اصابت سيارته و اشتد البكاء حتى اني كنت في اشارة مرور و اضع وجهي بين يدي لا ابالي بما يحدث من حولي سوى التفكير في زوجي و إذ بي اوفوجئ بصوت الباعة المتجولين و هم يفوقوني من البكاء مع سؤال بعضهم البعض " مالها دي دي بتعيط جامد قوي ليه كده" انطلقت عائد لزوجي حيث ابلغته قبل وصولي البيت حتى يذهب معي إلى القسم لعمل محضر ضبط و احضار ، و ذهبنا بالفعل لقسم الشرطة و برضه لسنا في حاجة لوصف مهزله السؤال عن عمل محضر و كأنك الجانى ليس مجني عليه ، دخلت مع زوجي لحضرة الظابط و ابلغناه بالواقعة وجاءت :"رخصة حضرتك لو سمحت " وبكل بلاها اعطيته البطاقة ويردد "لو سمحت فين رخصتك "وانا مصممه مهي مع حضرتك اهة حتى ادركت انها البطاقة و اعطيته الرخصة ثم طلب رخصة السيارة و اخرجها زوجي من حافظته ( اصلها كمان مكنتش معايا في الحادث)و ووجدنا الظابط ينظر لنا و كانه يكاد ان يلقي بالفاظ و بصوت به استهزاء "وبعدين بقى دي الرخصة منتهية يا استاذ "و نظر لي زوجي ورد ببرود"يا راجل " خرجنا دون عمل محضر طبعا و إلا كنا حندخل في مواضيع تانيه خالص وفي اثناء عودتنا من القسم و في نفس الاشارة التي كنت ابكي فيها فوجئت بنفس بالباعة المتجولين يطرقوا زجاج السياره لزوجي طالبين منه فتح الزجاج ولان الخبطة كانت في الباب فلم يتمكن زوجي من فتح الزجاج إلا فتحه صغيره يمكن منها سماع المتحدث و فوجئ زوجي ان البائع يتجه قائلا : " و النبي يا بيه ماتزعلها كده تاني دي كانت بتعيط جامد اوي ..حرام عليك و النبي ماتعيطها تاني" نظر زوجي الي قائلا " كمان فضحتينا " ( مايعرفش اني قبل الاشارة دي كنت وقفت لامين شرطة اعيط له و اسئله اعمل إيه وحده خبطتني )

ومبي :

اعتادت امي و نحن ضغار انا و اخي ان تاخذنا لكي ناكل خارج المنزل يومين او اكثر للفسحه يعني و كنا دائما عند سؤالنا إين نفضل تناول غدائنا بصوت واحد كالكورال الحافظ الانوده "ومبي " اللذيذ اني كنت مصممه ان الهمبورجر الي في ومبي اسمه طعميه كبير مدوره و كنت دايما امام الجرسون اقول لو سمحت عايزه اكل طعميه الكبيره دي و فوقها بيض .

عادة النوم

كنت و انا صغيره لي عادة سيئه للغايه و هي اني كنت لازم امص الفانلة الداخليه اللي لبساها او اى فانلة و خلاص في فمي طول الليل و اثناء النوم و افضل امصمص فيها و كأنها قصب و بالتالي كنت اكتر طفله بيجيلها لوَز و التهاب رئوي .

الجبنة البيضاء

اخي الكبر كان يعشق اكل الجبنة البيضاء بس يظهر اني كنت اكتر منه ، في احدى المرات كانت امي تطعم اخي مربع من الجبنة البيضاء واثناء اطعامه فوجئت بعدم وجود المربع باكمله و نظرت لي لتجد قالب الجبنة البيضاء كله في فمى، اكله بكل اندماج و استمتاع ..يظهر اني مفجوعه من صغري .

غساله الملابس والفراخ

كنت من نوع الاطفال المتعب في الاكل و كانت امي عندها طول بال غير طبيعي ، احيانا كنت اتناول وجبه الغداء في 4 ساعات ( عاتشي جدا) وفي سط الطعام استاذن للذهاب للحمام كل نصف ساعة و ذلك لالقي الطعام وراء غساله الملابس و العوده لاخذ ملعقة جديدة حتى اكتشفت امي ما افعله ...و اخذت علقة إيه .ٍ

الارز

حاسة الشم عندي كانت من اقوى الحواس لدي ، حتى اني في يوم من الايام خبطت على الجيران و وقلتلهم " انتوا طابخين رز يا طنط؟؟!!!"




انجى الكليسلى